Хасан Басриге (Алланың рахымы болсын) бір кісі келіп:
- Пәленше сізді жамандады, сіз туралы мынадай-мынадай орынсыз нәрселерді айтты, - дейді. Хазіреті Хасан Басри:
- Сен бұл сөздерді сол кісінің өз аузынан естідің бе? - деп сұрайды. Әлгі кісі:
- Иә, мені қонаққа шақырған болатын, дастархан басында сіз туралы осы нәрселерді айтты», - дейді.
- Дастарханда не бар еді, сені қалай күтті, жақсы ішіп-жедің бе?
- Ооо, дастарханда әртүрлі сусындар мен етті тағамдар болды, қонақжай кісі екен, жақсы ішіп-жедік, - дейді. Сонда Хасан Басри (Алланың рахымы болсын):
- Осыншама тағамдарды ішіңе сыйдырып, екі ауыз сөзді ішіңе сыйдыра алмай маған неге әкелдің?» - деген екен.